Yangilanish, 18:55: Energetika vazirligi rasmiy axborot berdi — gaz bosimi yaqin 2–3 soat ichida me’yorga keladi. Batafsil.
14-noyabr kuni kechqurun Toshkentning bir qator tumanlarida aholi tabiiy gaz bosimi keskin pasaygani yoki gaz umuman yo‘qligidan shikoyat qilmoqda. Soat 18:45 holatiga ko‘ra, gaz ta’minoti tashkilotlari bu borada rasmiy izoh bermagan edi.
Shikoyatlar Yangihayot, Sergeli, Uchtepa, Mirzo Ulug‘bek, Yunusobod va Chilonzor tumanlaridan kelmoqda. Shahar kommunal xizmatlarining 1055 markaziy dispetcherlik Telegram guruhida soat 17:30 dan keyin fuqarolar ketma-ket gaz yo‘qligi haqida yozgan. Ayrimlar bosim tushdan keyin pasayib, kechqurun gaz butunlay yo‘qolganini aytmoqda.
Fuqarolar xabarlari asosida uzilishlarni xaritaga tushiradigan Sveta.Net xizmatida soat 17:44 holatiga gaz bo‘yicha 63 ta xabar qayd etilgan, ulardan 36 tasi tasdiqlangan. Xizmat 1055 kanalidan yana 306 ta murojaatni xaritaga qo‘shgan. Belgilar shaharning deyarli barcha qismida bor, eng ko‘pi janubi-g‘arbiy tumanlarda.
“Choy ikki soatda ham qaynamayapti. Hali qish kelgani yo‘q”, — deb yozmoqda fuqarolar ijtimoiy tarmoqlarda.
Rasmiy idoralar nima deydi?
“Hududgazta’minot” AJ Telegram kanalida Toshkentdagi bosim pasayishi yuzasidan hozircha xabar yo‘q. Kanaldagi bugungi so‘nggi post (soat 16:30) boshqa hududga tegishli.
Shu kuni ertalab kompaniya kuz-qish mavsumida gaz taqsimoti bo‘yicha Vazirlar Mahkamasi qarori haqida ma’lumot bergan. Unga ko‘ra, 2026-yil 1-oktyabrdan 2027-yil 31-martgacha birinchi navbatda aholi xonadonlari, maktablar, bog‘chalar va shifoxonalar gaz bilan ta’minlanadi.
Qarorda magistral quvurlarda bosim pasaysa, gaz taqsimoti tezkor qayta ko‘rib chiqilishi aytilgan. Havo harorati keskin pasaygan kunlarda boshqa toifadagi iste’molchilarga vaqtinchalik cheklov qo‘yilishi mumkin.
Gaz bosimi pasaysa nima qilish kerak?
- Gaz bosimi pasaygan yoki gaz yo‘q bo‘lsa, barcha gaz jihozlarini o‘chirib qo‘ying va xonada gaz hidi yo‘qligini tekshiring.
- Gaz hidi sezilsa, chiroqni yoqmang va darhol 104 raqamiga qo‘ng‘iroq qiling.
- Gaz yo‘qligi haqida shahar dispetcherligiga 1055 raqami orqali xabar bering.
- Gaz plitasi yoki isitgich ishlab turgan xonada uxlamang.
