Dekabrda o‘tkaziladigan chet tili imtihoniga ro‘yxatdan o‘tish 13-noyabrda boshlandi va 27-noyabrgacha davom etadi. Imtihon 12–14-dekabr kunlari bo‘ladi, to‘lovni 28-noyabrgacha amalga oshirish kerak.
Bu haqda Bilim va malakalarni baholash agentligining imtihonlar jadvaliga tayanib “Ta’lim xabarlari” xabar berdi. Ariza my.gov.uz portali orqali beriladi.
Chet tili sertifikati OTMga kirishda, magistraturaga hujjat topshirishda va o‘qituvchilarga ustama olishda kerak bo‘ladi. Shuning uchun dekabr bosqichi yil oxirigacha sertifikat olmoqchi bo‘lganlar uchun so‘nggi imkoniyatlardan biri.
Dekabrdagi imtihon qachon bo‘ladi?
Imtihon 2026-yil 12, 13 va 14-dekabr kunlari o‘tkaziladi. Aniq kun, smena va manzil ruxsatnomada ko‘rsatiladi.
Asosiy sanalar:
| Bosqich | Sana |
| Ro‘yxatdan o‘tish | 13–27-noyabr |
| To‘lovning oxirgi kuni | 28-noyabr |
| Imtihon | 12–14-dekabr |
Qaysi tillardan imtihon topshirish mumkin?
E’lon qilingan jadvalga ko‘ra, dekabr bosqichida ingliz, arab, turk, yapon, uyg‘ur, dari, pushtu va hind tillaridan imtihon o‘tkaziladi. Nemis va fransuz tillaridan imtihon elektron shaklda bo‘ladi.
Ro‘yxatdan o‘tish hududlar kesimidagi kvota bilan cheklangan: hududdagi o‘rinlar to‘lsa, ro‘yxat muddatidan oldin yopilishi mumkin. Shu sababli arizani oxirgi kunlarga qoldirmaslik tavsiya etiladi.
Imtihon qancha turadi?
Imtihon to‘lovi 594 ming so‘m. Bu miqdor bir yarim bazaviy hisoblash miqdorining (BHM) 90 foiziga teng: 1-sentabrdan BHM 440 ming so‘m bo‘lgani uchun to‘lov ham shunga ko‘ra hisoblanadi.
BHMning joriy qiymatini asosiy ko‘rsatkichlar sahifamizda, boshqa yig‘imlarni esa BHM kalkulyatori yordamida hisoblash mumkin.
Ro‘yxatdan qanday o‘tiladi?
Ro‘yxatdan o‘tish my.gov.uz portalidagi chet tilini bilish darajasini aniqlash xizmati orqali amalga oshiriladi. Tartib quyidagicha:
- my.gov.uz portaliga OneID orqali kiring;
- chet tilini bilish darajasini aniqlash bo‘yicha xizmatni tanlang;
- tilni, imtihon sanasini va hududni belgilang, fotosurat yuklang;
- arizani yuboring va to‘lovni 28-noyabrgacha amalga oshiring;
- imtihon oldidan ruxsatnomani shaxsiy kabinetdan yuklab oling.
To‘lov muddatida amalga oshirilmasa, ariza bekor bo‘lishi mumkin. Shuning uchun to‘lov holatini shaxsiy kabinetda tekshirib qo‘yish kerak.
Imtihonga nima olib borish kerak?
Imtihonga shaxsni tasdiqlovchi hujjat (pasport yoki ID karta) va ruxsatnoma bilan kelinadi. Imtihon joyi va vaqti ruxsatnomada ko‘rsatiladi, shuning uchun uni oldindan tekshirib qo‘yish kerak.
Ruxsatnoma, smena, uzrli sabab bilan kela olmaslik va apellyatsiya qanday ishlashi haqida sertifikat imtihoni bo‘yicha 10 ta savolga javob bergan edik. Boshlang‘ich sinf o‘qituvchilari uchun alohida milliy sertifikat imtihoni 20-noyabrda bo‘lib o‘tadi.
Jadvalda imtihon sanalari davlat tadbirlari yoki arizachilar soniga qarab o‘zgarishi mumkinligi ham qayd etilgan. O‘zgarish bo‘lsa, bu haqda my.gov.uz va agentlikning rasmiy kanallarida e’lon qilinadi.
