O‘zbekistonda 27-oktabrdan Apple Pay xizmati ishlay boshladi, ammo hozircha unga faqat ayrim banklarning Visa va Mastercard kartalarini ulash mumkin. Uzcard va Humo kartalari ro‘yxatda yo‘q. Quyida qaysi kartalar ishlashi, iPhone’ga karta qanday qo‘shilishi va qayerda to‘lash mumkinligini jamladik.
Apple Pay’ga qaysi banklarning kartalari ulanadi?
Hozircha sakkizta bankning xalqaro Visa va Mastercard kartalarini ulash mumkin. Markaziy bank ma’lum qilishicha, ro‘yxat banklar va to‘lov tizimlarining texnik tayyorligiga qarab bosqichma-bosqich kengaytiriladi.
| Bank | Ulanadigan kartalar |
|---|---|
| Uzum Bank | Visa |
| Hamkorbank | Visa |
| Orient Finans Bank | Visa, Mastercard |
| O‘zmilliybank | Visa, Mastercard |
| Kapitalbank | Visa, Mastercard |
| Ipak Yo‘li banki | Visa, Mastercard |
| TBC Bank | Visa, Mastercard |
| Octobank | Visa, Mastercard |
Ro‘yxatdagi bankning har bir kartasi ham ulanavermaydi: bu karta turiga bog‘liq. Shuning uchun kartangiz qo‘shilmasa, avval bankingizdan so‘rab ko‘ring. Xizmat endigina ishga tushgani sababli ayrim foydalanuvchilarda karta qo‘shishda vaqtinchalik muammolar bo‘lishi mumkin.
Uzcard va Humo kartalari qachon ulanadi?
Aniq sana rasman ma’lum qilinmagan. Markaziy bank Uzcard va Humo kartalarini Apple Pay’ga ulash bo‘yicha ishlar davom etayotganini aytgan, ammo muddatini ko‘rsatmagan.
Demak, hozircha oylik maoshi yoki pensiyasi Uzcard yoki Humo kartasiga tushadiganlar Apple Pay’dan foydalanishi uchun ro‘yxatdagi banklardan biridan Visa yoki Mastercard kartasi ochishi kerak bo‘ladi.
iPhone’ga karta qanday qo‘shiladi?
Karta Wallet ilovasi orqali bir necha daqiqada qo‘shiladi. Buning uchun iPhone’da so‘nggi iOS versiyasi, Apple ID hisobi va Face ID, Touch ID yoki parol yoqilgan bo‘lishi kerak.
- Wallet ilovasini oching va yuqoridagi “+” tugmasini bosing.
- “Debet yoki kredit karta”ni tanlang.
- Kartani kamera bilan skanerlang yoki ma’lumotlarini qo‘lda kiriting.
- Shartlarga rozilik bildiring va bankdan kelgan SMS kod bilan tasdiqlang.
Avval shu iPhone’da biror ilovada ishlatgan kartangiz bo‘lsa, Wallet uni ro‘yxatda o‘zi taklif qiladi, faqat tanlab tasdiqlash qoladi.
Ayrim banklarning mobil ilovasida “Apple Wallet’ga qo‘shish” tugmasi ham bor. U ko‘rinmasa, ilovani yangilang yoki kartani Wallet orqali qo‘shing.
Apple Pay bilan qayerda to‘lash mumkin?
Kontaktsiz to‘lov qabul qiladigan har qanday terminalda iPhone yoki Apple Watch bilan to‘lash mumkin. Har bir to‘lov Face ID, Touch ID yoki parol bilan tasdiqlanadi, karta raqami esa sotuvchiga berilmaydi.
Apple Watch’da to‘lash uchun kartani iPhone’dagi Watch ilovasi orqali soatga alohida qo‘shish kerak.
Onlayn xaridlarda esa Apple Pay sayt yoki ilova uni qo‘llab-quvvatlasagina ishlaydi. Masalan, Click to‘lov tizimi 28-oktabrdan hamkor saytlarining to‘lov sahifasiga Apple Pay’ni qo‘shdi. Bu ham faqat Visa va Mastercard kartalari bilan ishlaydi.
Android smartfon egalari 27-oktabrdan Google Wallet ilovasiga ham karta qo‘sha oladi. Unga to‘qqizta bankning Visa va Mastercard kartalari ulanadi: AVO Bank, Octobank, Uzum Bank, TBC Bank, Aloqabank, Kapitalbank, Ipak Yo‘li banki, O‘zmilliybank va Orient Finans Bank. Telefonda NFC bo‘lishi shart. Telefon narxlari bilan bog‘liq yangilik bilan esa smartfonlarga bojxona boji 0 foiz bo‘lishi haqidagi maqolamizda tanishishingiz mumkin. Telefonni ro‘yxatdan o‘tkazish tizimi haqida UzIMEI tarixi haqidagi materialimizda yozganmiz.
