Toshkent viloyati, Oqqo‘rg‘on tumanidagi Davlat kadastrlari palatasi muhandisi 2024 yilda qabul qilingan “O‘zboshimchalik bilan egallab olingan yer uchastkalari va ularda qurilgan inshootlarga bo‘lgan huquqlarni tan olish to‘g‘risida”gi qonun asosida, noqonuniy egallab olingan 9 sotix yer maydoniga egalik guvohnomasini rasmiylashtirib berish va uy-joy qurishga ruxsat olib berish evaziga mahalliy fuqarodan 1200 AQSh dollari talab qilgan.
Davlat xavfsizlik xizmati Toshkent viloyati boshqarmasi va Ichki ishlar vazirligining Jinoyat-qidiruv departamenti tomonidan o‘tkazilgan tezkor tadbirda, kadastr muhandisi so‘ralgan pul mablag‘ini olayotgan paytda, ashyoviy dalillar bilan ushlandi.
Holat yuzasidan unga nisbatan Jinoyat kodeksining 168-moddasi 3-qismi “v” bandi va 28,211-moddasi 1-qismi bilan jinoyat ishi qo‘zg‘atilib, tergov harakatlari davom etmoqda.
