Qamashi tumanida yashovchi, ilgari sudlangan fuqaro 360 million soʻmlik soliq qarzini toʻlamagan holda bankrot deb topilgan gʻisht ishlab chiqaruvchi MChJ faoliyatini qayta tiklash evaziga korxona rahbaridan 4 ming AQSh dollari miqdorida pora talab qilgan.

Davlat xavfsizlik xizmati (DXX)ning Qashqadaryo viloyati boshqarmasi va Iqtisodiy jinoyatlarga qarshi kurashish departamenti tomonidan oʻtkazilgan tezkor tadbirda mazkur shaxs 3 ming dollarni avans sifatida olayotgan vaqtida qoʻlga olindi.

Tergov davomida aniqlanishicha, ushbu noqonuniy harakatga Qamashi tuman soliq inspeksiyasi boshligʻining oʻrinbosari ham aloqador boʻlgan. U ham 3 ming dollar pora olayotgan paytda barcha ashyoviy dalillar bilan qoʻlga olindi.

Hozirda ushbu holat yuzasidan ikki shaxsga nisbatan jinoyat ishi qoʻzgʻatilib, tergov harakatlari olib borilmoqda.