O‘zbekistonda “Xavfsiz talaba” mobil ilovasi atrofidagi mojaro fonida beshta oliy ta’lim muassasasi rektori lavozimidan ozod etilgani haqida xabarlar tarqaldi. Ular orasida O‘zbekiston davlat jahon tillari universiteti va Samarqand davlat chet tillari instituti rahbarlari ham borligi aytilmoqda. Hozircha mazkur kadrlar o‘zgarishlari rasman tasdiqlangani haqida ma’lumot yo‘q.
QALAMPIR.UZ nashrining o‘z manbalariga tayanib xabar berishicha, 6-noyabr kuni Ta’lim va ilm-fan vaziri Erkinjon Turdimov o‘tkazgan yig‘ilishda beshta oliy ta’lim muassasasi rektori lavozimidan ozod etilgan.
Nashr manbasiga ko‘ra, ular orasida O‘zbekiston davlat jahon tillari universiteti rektori Ilhomjon To‘xtasinov hamda Samarqand davlat chet tillari instituti rektori Bahodir Holiqov bor.
Jahon tillari universiteti rektorining lavozimidan ozod etilishi “Xavfsiz talaba” ilovasi bilan bog‘liq mojaro oqibati ekani aytilmoqda. Qolgan rektorlarning ishdan olinishi sabablari haqida ma’lumot keltirilmagan.
Mazkur xabar so‘nggi kunlarda oliy ta’lim muassasalarida talabalardan mobil ilovani majburiy o‘rnatish talab qilingani haqidagi shikoyatlar, vazirlikning munosabati va universitet dekanining ishdan olinishi ortidan paydo bo‘ldi.
Mojaro qanday boshlandi?
3-noyabr kuni ijtimoiy tarmoqlarda O‘zbekistonning bir qator oliy ta’lim muassasalarida talabalardan “Xavfsiz talaba” mobil ilovasini telefonlariga o‘rnatish talab qilinayotgani haqida murojaatlar tarqaldi.
Jumladan, O‘zbekiston davlat jahon tillari universitetining ayrim talabalari oliygohga kirishda to‘xtatilib, ilovani yuklab olishga majburlanganini bildirgan.
Ularning aytishicha, ushbu jarayon sabab ayrim talabalar darslarga kechikkan, ba’zilariga esa davomat bo‘yicha “NB” belgisi qo‘yilgan.
Shuningdek, talabalar dars vaqtida dekanat xodimlari va tyutorlar auditoriyalarga kirib, ilovani o‘rnatishni talab qilgani, bunga rozi bo‘lmaganlarga tanbeh berilganini da’vo qilgan.
Shunga o‘xshash murojaatlar Toshkent davlat yuridik universiteti va Jahon iqtisodiyoti va diplomatiya universiteti talabalaridan ham kelib tushgan.
Jahon tillari universitetida dekan ishdan olindi
3-noyabr kuni O‘zbekiston davlat jahon tillari universitetining Tarjimonlik fakulteti dekani Ulug‘bek Yo‘ldoshev lavozimidan ozod etilgani ma’lum bo‘ldi.
Bu haqda dastlab QALAMPIR.UZ xabar berdi. Keyinchalik universitet matbuot xizmati ham dekan ishdan olinganini “Daryo” nashriga tasdiqlagan.
“Daryo” jurnalistlari holatni o‘rganish maqsadida universitetga borib, talabalar va mas’ullar bilan suhbatlashgan.
Dastlab oliygoh vakillari talabalarning darslarga kiritilmagani haqidagi ma’lumotlarni rad etgan. Universitet ma’muriyati ilovani o‘rnatish tavsiyaviy ekanini bildirgan.
Biroq jurnalistlar universitetdagi kuzatuv kameralarining tasvirlarini o‘rganib, fakultet tyutorlari talabalardan ilovani o‘rnatishni talab qilganiga oid holatlarni qayd etgan.
Keyinchalik universitet tomonidan tegishli choralar ko‘rilgani va talabalar darslarga kiritilgani ma’lum qilingan.
Dekanning ishdan olinishi ham e’tirozlarga sabab bo‘ldi
4-noyabr kuni Tarjimonlik fakulteti professor-o‘qituvchilari nomidan tarqatilgan murojaatda dekan Ulug‘bek Yo‘ldoshevni lavozimiga qaytarish va vaziyatni adolatli ko‘rib chiqish so‘ralgan.
Murojaat mualliflari ilovani joriy etish bo‘yicha talablar yuqori tashkilotlardan kelgan bo‘lsa, mas’uliyat nega aynan fakultet dekani zimmasiga yuklanganini savol ostiga olgan.
Biroq mazkur fikrlar mojaro yuzasidan barcha mas’uliyat va topshiriqlar zanjiri aniqlanganini anglatmaydi.
Mojaro X ijtimoiy tarmog‘ida ham muhokama qilindi
“Xavfsiz talaba” ilovasi atrofidagi voqealar X ijtimoiy tarmog‘ida ham munosabatlarga sabab bo‘ldi. Ayrim foydalanuvchilar majburiy o‘rnatish haqidagi shikoyatlarni tanqid qilgan bo‘lsa, boshqalari Jahon tillari universitetida dekan ishdan olinganiga munosabat bildirdi.
3-noyabr kuni Arthur Aliyev ilova bilan bog‘liq vaziyatni tanqid qilib, talabalar noroziligi yuzaga kelishi ehtimoliga kinoyali ishora qildi.
Xavfsiz talaba, apk va boshqa balo battarlar… Toshkentga ham bitta Z avlod namoyishlari yetmayapti shekilli.
— Arthur Aliyev (@itsArturAliyev)
November 3, 2026
Shu kuni Madina_jon ismli foydalanuvchi Jahon tillari universiteti dekanining lavozimidan ozod etilishi haqida kinoyali munosabat bildirdi.
Xavfsiz talaba ilovasi orqasidan dekan bo’shab ketgan mashhur jahon tillari universitetimiz xuddiki o’sha tinimsiz o’zini har ko’yga soladigan «bloger»ga o’xshaydi)
— Madina_jon (@Madinap10010)
November 3, 2026
Mojaro turk tilidagi axborot maydonida ham yoritildi. 6-noyabr kuni turkiyalik jurnalist Erkin Öncan O‘zbekiston universitetlarida talabalar ilovani o‘rnatishga majburlangani va ayrimlari darslarga kiritilmagani haqidagi xabarlarni X sahifasida e’lon qildi.
Özbekistan’da üniversitelerde ‘zorunlu App’ tartışması…
Özbekistan’daki bazı üniversitelerde öğrencilerin ‘Güvenli Öğrenci’ (Xavfsiz talaba) adlı mobil uygulamayı telefonlarına yüklemeye zorlandığı, uygulamayı yüklemeyi reddeden öğrencilerin derslere alınmadığı öne sürülüyor.
Özbekistan’daki bazı basın kuruluşlarının öğrencilerden aktardığına göre, 3 Kasım’da üniversite kapısında durdurulan öğrenciler uygulamayı yüklemeye zorlandı.
Bu nedenle derslerine geç kalan bazı öğrencilere devamsızlık kaydı düşüldü.
Ayrıca ders sırasında sınıflara giren dekan, dekan yardımcıları ve akademik danışmanların, uygulamayı yüklemeyen öğrencileri ayağa kaldırarak yükleme yapmaları konusunda baskı kurduğu iddia edildi.
— Erkin Öncan (@erknoncn)
November 5, 2026
Izoh: X foydalanuvchilarining postlari ularning shaxsiy munosabatlari va tarqatgan ma’lumotlarini aks ettiradi. Ularda keltirilgan da’volar rasmiy tekshiruv xulosasi hisoblanmaydi.
Vazirlik nima dedi?
Talabalarning shikoyatlari ortidan Ta’lim va ilm-fan vazirligi vaziyatni o‘rganish boshlanganini ma’lum qildi.
Vazirlik rahbariyati holatni tezkor o‘rganish bo‘yicha ko‘rsatma bergan va maxsus ishchi guruh faoliyati yo‘lga qo‘yilgan.
Kun.uz nashriga berilgan izohda vazirlik vakili oliy ta’lim muassasalariga talabalarni “Xavfsiz talaba” ilovasini o‘rnatishga majburlash bo‘yicha topshiriq berilmaganini bildirgan.
Shuningdek, vazirlik ta’lim jarayonining uzluksizligi va talabalarning ta’lim olish huquqi ta’minlanishi shartligini ta’kidlagan.
Shu bilan birga, ilovani joriy etish masalasi avvalroq ham muhokama qilingan.
Jumladan, vazirlikning rasmiy axborotiga ko‘ra, 12-oktabr kuni Bosh prokuratura tashabbusi bilan o‘tkazilgan yig‘ilishda “Xavfsiz talaba” platformasining imkoniyatlari taqdim etilgan.
Unda oliy ta’lim muassasalaridagi videokuzatuv va kirishni nazorat qilish tizimlari hamda talabalar turar joylariga oid ma’lumotlarni monitoring tizimlari bilan bog‘lash masalalari muhokama qilingan.
Biroq platformani joriy etishga oid tashkiliy ishlar olib borilgani talabalarga ilovani majburan o‘rnatish yoki o‘rnatmaganlarni darsdan chetlatish bo‘yicha rasmiy topshiriq mavjudligini anglatmaydi.
“Xavfsiz talaba” ilovasi nima uchun kerak?
“Xavfsiz talaba” platformasi oliy ta’lim muassasalarida talabalar xavfsizligini ta’minlash va ayrim jarayonlarni raqamlashtirishga mo‘ljallangan.
Ochiq ma’lumotlarda platformaning elektron talabalik guvohnomasi, favqulodda vaziyatlarda SOS chaqiruvi, davomatni kuzatish va talabalar turar joylariga oid xizmatlar kabi imkoniyatlari tilga olingan.
Shu bilan birga, ilovaning talabalarning shaxsiy telefonlariga qanday tartibda o‘rnatilishi, uning ixtiyoriy yoki majburiyligi va shaxsiy ma’lumotlardan foydalanish shartlari yuzasidan savollar saqlanib qolmoqda.
