Samarqand–Buxoro yo‘nalishida sement-beton qoplamali pulli avtomobil yo‘lini qurish rejalashtirilmoqda. Loyiha ikki shahar o‘rtasidagi safar vaqtini besh soatdan bir yarim soatgacha qisqartirish imkonini berishi kutilmoqda.
Bu haqda Prezident Shavkat Mirziyoyevning Buxoro viloyatiga tashrifi doirasida hudud iqtisodiyotini rivojlantirish va aholi turmush darajasini oshirish masalalariga bag‘ishlangan yig‘ilishda ma’lum qilindi.
Samarqand–Buxoro yo‘nalishida qanday loyihalar rejalashtirilgan?
Pulli avtomobil yo‘li bilan birga, ushbu yo‘nalishda tezyurar poyezdlar uchun yangi temir yo‘l liniyasini barpo etish ham ko‘zda tutilgan.
Davlat rahbari mutasaddilarga avtomobil va temir yo‘l loyihalarining master-rejalarini yakunlash hamda hamkorlar bilan muzokaralarni boshlash bo‘yicha topshiriq berdi.
Taqdim etilgan ma’lumotlarda pulli yo‘lning foydalanishga topshirilish sanasi va undan foydalanish narxi keltirilmagan.
M-37 yo‘lining 69 kilometri yangilanadi
Yig‘ilishda kelasi yil M-37 avtomobil yo‘lining Buxoro viloyati hududidagi 69 kilometrini yangilash ishlari boshlanishi bildirildi.
Qiymati 200 million dollar bo‘lgan ushbu loyiha doirasida Buxoro shahri atrofida 4,5 kilometrlik aylanma yo‘l ham quriladi. Bu mablag‘ Samarqand–Buxoro pulli yo‘liga emas, M-37 yo‘lini yangilash loyihasiga tegishli.
Shuningdek, joriy yilda Buxorodan o‘tuvchi A-380 avtomobil yo‘lini rekonstruksiya qilish yakunlanishi ma’lum qilindi.
