Eron va Isroil o‘rtasidagi keskinlik harbiy to‘qnashuv bosqichiga o‘tdi: ikki davlat bir-birining hududidagi strategik obyektlarga ballistik raketa hujumlari uyushtirdi, buning oqibatida halok bo‘lganlar, yaralanganlar va infratuzilmaviy yo‘qotishlar qayd etildi.
Eronning zarbasi: Isroilning Hayfa shahri nishonga olindi
Eronning Mehr agentligi xabariga ko‘ra, Tehrondan uchirilgan ballistik raketalar Isroilning shimoliy qismida joylashgan Hayfa shahriga yo‘naltirilgan.
• Ayrim raketalar Isroilning havo mudofaa tizimlarini yorib o‘tgan va to‘g‘ridan-to‘g‘ri Hayfadagi neftni qayta ishlash zavodiga zarba bergan.
• IRNA agentligi bu hujumni “muvaffaqiyatli” deb atab, neft zavodi ishdan chiqqanini tasdiqlagan.
• Shuningdek, raketalardan biri ikki qavatli uyni vayron qilgani, natijada 1 kishi halok bo‘lgani, 14 kishi jarohatlangani haqida Ynet portali xabar bergan.
Tehrondagi neft omborlari yo‘q qilindi
Isroil armiyasi (sahal) javoban Tehrondagi ikki neft omboriga havo zarbalari uyushtirdi.
• Tasnim agentligiga ko‘ra, Kaan va Shahron tumanlaridagi yirik neft infratuzilmalari butunlay yonib ketgan.
• Zarba oqibatlarini bartaraf etish uchun favqulodda xizmatlar safarbar etilgan, ammo hozircha qurbonlar va jarohatlar bo‘yicha rasmiy ma’lumot berilmagan.
Mazkur raketa hujumlari Isroil tomonidan avvalroq Tehron yaqinidagi Eron yadroviy infratuzilmasiga qarshi amalga oshirilgan keng ko‘lamli havo hujumlari ortidan sodir bo‘ldi. Ular orasida SPND yadroviy loyihasi va Mudofaa vazirligi binolari ham nishonga olingan edi.
