Afg‘onistonning bir qator viloyatlarida ommaviy axborot vositalarida odamlar, hayvonlar va boshqa tirik mavjudotlar tasvirlarini efirga uzatish qat’iy taqiqlanmoqda.

So‘nggi holatda Lag‘mon viloyati hokimiyati davlat telekanali va xususiy radiostansiyalar mazkur cheklovni rasmiy ravishda joriy etgani aytilmoqda.

Ushbu taqiq “ezgulikni targ‘ib qilish va buzuqlikdan saqlanish”ni nazarda tutuvchi axloqiy normalarga asoslanadi. Yangi qoidalarga ko‘ra, tirik mavjudotlar tasvirlari faqatgina televideniye va radio dasturlarida emas, balki bu OAVlarning ijtimoiy tarmoqlardagi sahifalarida ham namoyish etilmasligi lozim.
Lag‘mon viloyati bu kabi cheklov joriy etilgan navbatdagi hudud bo‘ldi.

KabulNow nashrining xabariga ko‘ra, bunday taqiqlar avvalroq Qandahor, Hilmand, Zabul, Badaxshon, Bamiyon, Daykundi va Faryob kabi jami 18 viloyatda joriy etilgan. Afg‘onistonda jami 34 ta viloyat mavjud, bu esa cheklovlar deyarli yarim mamlakatni qamrab olganini anglatadi.

Lag‘monda faoliyat yuritayotgan axborot vositalari orasida davlatga qarashli RTA telekanali hamda kamida to‘rtta xususiy radiostansiya bor. Ularning barchasiga ushbu taqiq qat’iy qo‘llanilmoqda. Ba’zi telekanallar tirik mavjudotlar tasvirlari o‘rniga tabiat videolari yoki grafik animatsiyalarni qo‘llashga o‘tgan.

So‘nggi to‘rt yil ichida “Tolibon” Afg‘onistonda madaniy va sport faoliyatlariga nisbatan qator cheklovlar joriy etdi. Masalan, Afg‘oniston shaxmat federatsiyasi faoliyati to‘xtatildi va shaxmat “taqiqlangan o‘yin” deb e’lon qilindi. Ayollar teatr, musiqa va sport tadbirlaridan butunlay chetlatilgan, ko‘plab jurnalistlar esa o‘z ishini yo‘qotgan.

Afg‘oniston Mustaqil Jurnalistlar Uyushmasi rahbari Azizulloh Mujaddidi shunday deydi:

“Ba’zi viloyatlarda mustaqil OAVlar tirik mavjudotlar tasvirlaridan voz kechishga majbur bo‘ldi. Bu esa faqat diniy emas, balki axborot erkinligi, san’at va jamiyat uchun ham og‘ir zarba.”

Xalqaro matbuot erkinligini himoya qiluvchi tashkilotlar bunday qoidalarni jurnalistikaga qarshi keng ko‘lamli hujum, fuqarolik jamiyatiga bosim va madaniy bo‘g‘ilish sifatida baholamoqda.
Hozircha “Tolibon” hukumati bu taqiqlarning davomiyligi yoki yakuniy ko‘lami borasida izoh berganicha yo‘q.