Nyu-York universiteti professori, neyrobiolog Vendi Suzukining aytishicha, smartfondagi bildirishnomalarni uygʻongan zahoti tekshirish miya, xotira va motivatsiya uchun juda xavfli.
Ertalablari miyaning neyromoslashuvchanligi yuqori darajada boʻladi va u atrofdagi sharoitga tez moslashadi. Uygʻongandan soʻng odatda dofamin va kortizol miqdori oshadi — bu gormonlar birgalikda odamlarga faol, tetik boʻlishga va diqqatni jamlashga yordam beradi.
“Miyaga erkinlik berilsa, u nimalarga qodirligini kuzatib koʻring”, — deydi tadqiqotchi.
Suzuki uygʻongandan keyin 20 daqiqa davomida telefonga umuman qaramaslikni va bu vaqtda kun uchun maqsad tuzish yoki oldinda turgan ishlarga eʼtibor qaratishni tavsiya qildi.
