Yaponiyaning Expo 2025 ko‘rgazmasida xodimlar jazirama issiqda quyosh quvvati bilan ishlaydigan nimcha kiyib yuribdi.
Ushbu nimcha Toyota Group tarkibidagi Toyoda Gosei, quyosh texnologiyasi startapi Enecoat Technologies va mato ishlab chiqaruvchi Seiren kompaniyalari tomonidan ishlab chiqilgan.
Nimchaga atigi to‘rt gramm keladigan ultra yupqa va egiluvchan quyosh panellari o‘rnatilgan. Ular quyosh nurini elektrga aylantirib, bo‘yinga taqiladigan ventilyatorni quvvatlaydi.
Oddiy tom panellaridan farqli ravishda, bu texnologiyada perovskit kristallari ishlatilgan. Perovskit panellari yengil, ishlab chiqarishga arzon va soyada ham quvvat ishlab chiqaradi.
Toyoda Gosei vakili Shinichiro Fuki bu loyihani “dunyoda ilk bor perovskitni kiyiladigan qurilmaga qo‘llash” deb atadi. Uning aytishicha, elektr manbai cheklangan joylarda ishlovchilar uchun bunday nimcha katta yordam beradi.
Texnologiya hozir Expo maydonida real sharoitlarda sinovdan o‘tkazilmoqda.
