Moddiy rag‘batlantirish uchun xarajatlar Majburiy ijro byurosini rivojlantirish jamg‘armasiga kelib tushgan ijro yig‘imi mablag‘larining 10 foizi miqdoridagi ajratmadan amalga oshiriladi.
Adliya vazirligida “Davlat ijrochilarini ijro yig‘imi hisobidan moddiy rag‘batlantirish tartibi to‘g‘risida”gi nizom davlat ro‘yxatidan o‘tkazildi (ro‘yxat raqami: 3624, 19.05.2025).
Ushbu nizom O‘zbekiston Respublikasi Bosh prokuraturasi huzuridagi Majburiy ijro byurosining davlat ijrochilari va davlat ijrochisi maqomiga ega bo‘lgan xodimlarini ijro yig‘imi hisobidan moddiy rag‘batlantirish tartibini belgilaydi.
Davlat ijrochilariga beriladigan moddiy rag‘batlantirish miqdorlari Ijro ishi yurituvlari yagona elektron bazasi orqali avtomatik tarzda har oy yakuni bo‘yicha hisoblab boriladi.
Moddiy rag‘batlantirish to‘lovlari davlat ijrochilarining ish yurituvidagi tamomlangan ijro ishlaridan oy davomida to‘lov tizimlari orqali undirilgan ijro yig‘imining bir qismi ajratish orqali amalga oshiriladi.
Moddiy rag‘batlantirish har oy yakuni bo‘yicha Byuro direktori va hududiy boshqarma boshlig‘ining buyrug‘iga asosan keyingi oyning 10-sanasiga qadar bajariladi.
