Bolgariya parlamenti raisi Nataliya Kiselova Prezident Rumen Radevning 2026-yilda yevroga o‘tish bo‘yicha umumxalq referendumi o‘tkazish taklifini konstitutsiyaga zid deb topdi va rad etdi.
Prezident Radev 2025-yil 12-may kuni parlamentga referendum o‘tkazish taklifini taqdim etgan edi. U fuqarolarga “Siz Bolgariyaning 2026-yilda yagona Yevropa valyutasi — yevroni qabul qilishiga rozimisiz?” degan savol bilan murojaat qilishi koʻzda tutilgan.
Biroq parlament raisi Kiselova bu taklifni konstitutsiyaga, Yevropa Ittifoqi shartnomalariga va mamlakat konstitutsiyaviy sudining avvalgi qarorlariga zid deb topdi.
Prezident Radev bu qarorni tanqid qilib, uni fuqarolarning ovozini eshitmaslik deb baholadi. U bu masalani Konstitutsiyaviy sudga olib chiqishini e’lon qildi. Radevning fikricha, referendum orqali fuqarolarning fikrini bilish muhim, chunki yevroga o‘tish masalasida jamiyatda turli fikrlar mavjud.
Hukumat esa yevroga o‘tishni 2026-yil 1-yanvarda amalga oshirishni rejalashtirmoqda. Bu borada Yevropa Komissiyasi va Yevropa Markaziy Bankining iyun oyida beriladigan baholashlari muhim ahamiyatga ega bo‘ladi.
Iqtisodchilar yevroga o‘tish Bolgariyaga xorijiy investitsiyalarni jalb qilish, kredit reytinglarini yaxshilash va qarz xarajatlarini kamaytirishga yordam berishini ta’kidlamoqda. Biroq jamoatchilik orasida narxlarning oshishi va inflyatsiya xavfi borasida xavotirlar mavjud. Xususan, 2023-yilda yevroga o‘tgan Xorvatiyada narxlarning oshganligi Bolgariya fuqarolarini tashvishga solmoqda.
