Payme toʻlov tizimi oʻz mijozlariga ogohlantirish bermasdan kartadan-kartaga oʻtkazmalar uchun 1,1% komissiya yecha boshlagan.
Yaqingacha bu 1% ni tashkil etgan, biroq soʻnggi kunlarda bir qancha foydalanuvchilar bu narx oʻzgarganini payqashgan.
Masalan, Uzcardʼdan Uzcardʼga Payme orqali pul oʻtkazilganda avval 1% komissiya olingan boʻlsa, hozir xuddi shu narsaga 1,1% komissiya yechilmoqda.
Payme mijozlarni qoʻllab-quvvatlash xizmati (call-markaz) operatori ham narxlarda oʻzgarish boʻlganini tasdiqlab, bunga ikki oydan oshganini maʼlum qildi.
Kompaniya tariflarda oʻzgarish boʻlgani haqida shu kungacha mijozlarga bildirishnoma yoxud ogohlantirish yubormagan. Qolaversa, rasmiy veb-saytda haligacha komissiya 1% koʻrsatilgan holatda turibdi.
