Toshkentda BMW va Kia haydovchilari o‘rtasida poyga tashkil etilishi natijasida ma’muriy javobgarlikka tortildilar. Ijtimoiy tarmoqlarda yo‘lda poyga qilgan haydovchilarning videosi tarqaldi.

Ishchi guruh tomonidan Sergeli tumanidagi Fayzli ko‘chasida sodir bo‘lgan voqea yuzasidan haydovchilarning shaxslari aniqlangan. Birinchi haydovchi so‘zlariga ko‘ra, ular qaysi avtomobil kuchliroq ekanligini sinab ko‘rishga qaror qilishgan.

Qoida buzgan fuqarolarga ma’muriy bayonnomalar tuzildi va BHM ning 25 baravari miqdorida jarima solindi. Shuningdek, avtomobillar jarima maydoniga joylashtirildi.

Qonun talablariga ko‘ra, yo‘l huquqbuzarligini sodir etgan shaxslar 1 yildan 2 yilgacha haydovchilik huquqidan mahrum qilinishi mumkin.