Bugun Prezident Shavkat Mirziyoyev yoshlar bilan uchrashuv o‘tkazmoqda. Tadbir avvalida davlatimiz rahbari O‘zbekiston yoshlarini 30-iyun – Yoshlar kuni bilan samimiy tabrikladi.
Davlat rahbari o‘z nutqida, so‘nggi yillarda iqtisodiyot tez sur’atlarda rivojlanib, imkoniyatlar kengayib borayotgani va bu yutuqlarda yoshlarning hissasi katta ekanini ta’kidladi.
“Bilagida kuch-g‘ayrat, har bir harakatida azmu shijoat jo‘sh urgan yigitlarimizni, bilim va odobda, aql-zakovatda tengsiz qizlarimizni ko‘rib, har qanday xalq, har qanday davlat bizga havas qilsa arziydi,” — dedi Prezident.
Shuningdek, Prezident yirik davlatlar va dunyoning yetakchi kompaniyalari bugun O‘zbekistonga ishonch bildirayotganini ta’kidladi. Unga ko‘ra, bu ishonch O‘zbekiston yoshlarining ilm-fan, ta’lim, IT, madaniyat, san’at va sportdagi yutuqlari tufayli yuzaga kelmoqda.
“Hamkorlarimiz yoshlarimizning ilm-fan, ta’lim, IT, madaniyat, san’at va sportdagi yutuqlarini ko‘rib, salohiyatimizga baho bermoqda, ertangi kunimiz poydevori mustahkam ekaniga ishonch hosil qilmoqda,” — dedi Shavkat Mirziyoyev.
Uchrashuv davom etmoqda.
