8-iyun, shanba kuni ertalab soat 06:00 dan 09:00 ga qadar Toshkent shahrining markaziy ko‘chalarida avtomobillar harakati vaqtincha to‘xtatiladi. Bu chora “Yoshlar kubogi” velomarafoni o‘tkazilishi bilan bog‘liq, deya xabar bermoqda shahar Ichki ishlar bosh boshqarmasi.

Velomarafon qatnashchilari xavfsizligini taʼminlash va jamoat tartibini saqlash maqsadida quyidagi ko‘chalar yopiladi:

Abay ko‘chasi — Abdulla Qodiriy ko‘chasidan Alisher Navoiy ko‘chasigacha;

Botir Zokirov ko‘chasi — Alisher Navoiy ko‘chasidan “O‘zbekiston” metro bekatigacha;

Afrosiyob ko‘chasi — “O‘zbekiston” metro bekatidan Nukus ko‘chasigacha;

Nukus ko‘chasi — Afrosiyob ko‘chasidan Farg‘ona yo‘li ko‘chasigacha;

Abdulla Qodiriy ko‘chasi — Farg‘ona yo‘lidan Abay ko‘chasi kesishmasigacha.

Toshkent shahar IIBB haydovchilardan vaqtinchalik noqulayliklarni inobatga olgan holda harakat rejasini oldindan belgilab olishni va aylanma yo‘llardan foydalanishni so‘radi.
Tadbir yakunlangach, harakat to‘liq tiklanishi rejalashtirilgan.