FIFA rahbari Janni Infantino, O‘zbekiston Prezidenti Shavkat Mirziyoyevga terma jamoaning ilk bor FIFA Jahon chempionatiga chiqqani munosabati bilan tabrik maktubi yo‘lladi.

“O‘zbekiston, Osiyoda birinchi bo‘lib JCH-2026 yo‘llanmasini qo‘lga kiritgan jamoalardan biri bo‘ldi. Butun futbol jamoatchiligi nomidan Sizni va xalqingizni ushbu tarixiy yutuq bilan tabriklayman”, — deyiladi maktubda.

Infantino ushbu yutuqni “birgalikdagi sa’y-harakatlar, qat’iyatli irodalar, va butun jamoadagi insonlarning fidoyiligi” bilan bog‘ladi. U hukumat, O‘zbekiston futbol assotsiatsiyasi, futbolchilar, murabbiylar, va ayniqsa “qalbi qaynoq muxlislar”ga alohida minnatdorlik bildirdi.

“Muhtaram prezident, Sizga 2026-yilgi FIFA Jahon chempionatida muvaffaqiyatlar tilayman va Siz, Janobi Oliylari bilan yana bir bor uchrashish imkoniyatini intiqlik bilan kutaman,” — deb yozdi Infantino.

2023-yil sentabr oyida, Shavkat Mirziyoyev Nyu-Yorkda Infantino bilan uchrashgan va O‘zbekistonda ommmaviy futbolni rivojlantirish haqida muzokaralar o‘tkazilgan edi. FIFA rahbari davlat rahbariga ismi tushirilgan to‘p sovg‘a qilgan.

Bundan avvalroq, 2023-yil may oyida, FIFA rahbari O‘zbekistonga rasmiy tashrif bilan kelib, prezidentga 24-raqamli futbolkani hadya qilgan edi.

Eslatma: O‘zbekiston milliy terma jamoasi, 5 iyun kuni BAA bilan 0:0 durang o‘ynab, tarixda ilk bor Jahon chempionatiga yo‘llanmani qo‘lga kiritdi. Bu muvaffaqiyat milliy sport tarixida burilish yasadi.