Qonunchilikka kiritilgan yangi qo‘shimchalarga ko‘ra, endilikda davlat mulki bo‘lgan, aholining madaniy-maishiy ehtiyojlari va dam olish uchun ajratilgan yerlarni xususiylashtirish yoki begonalashtirish qat’iyan man etiladi.

Ushbu hududlarda bino yoki inshootlar qurish, mavjud binolarni kengaytirish yoki yer maydonlarini qisqartirish ham taqiqlanadi.

Jinoyat kodeksiga kiritilgan yangi moddaga binoan, ushbu cheklovlarga rioya qilmaslik — yer berish tartibini buzish jinoyati sifatida baholanadi va unga jazoni kuchaytiruvchi normalar qo‘llanadi.

 Bundan tashqari, yer uchastkalarining foydalanish shakllari aniq belgilanadi — asosiy, shartli ruxsat etilgan va yordamchi turlarga bo‘linadi. Foydalanish bu tasniflarga qat’iy amal qilgan holda amalga oshiriladi.

 Shuningdek, botanika bog‘lari muhofaza etiladigan tabiiy hududlar sifatida belgilandi. Ularning hududida o‘simlik dunyosiga tahdid soluvchi har qanday faoliyat taqiqlanadi.

Yangi tartiblar — shaharsozlikni tartibga solish, ekologiyani asrash va yer resurslaridan foydalanishdagi adolatni ta’minlashga qaratilgan.