O‘zbekiston Respublikasi tashqi ishlar vaziri Baxtiyor Saidov Sloveniya Respublikasining O‘zbekistondagi yangi tayinlangan elchisi Alenka Suhadolnikdan ishonch yorliqlarini qabul qildi.

Uchrashuvda ikki mamlakat o‘rtasidagi ko‘p qirrali hamkorlikni yanada mustahkamlash va rivojlantirish uchun keng imkoniyatlar mavjudligi ta’kidlandi.

Baxtiyor Saidov Sloveniya elchisining tayinlanishi ikki tomonlama munosabatlar uchun yangi ufqlar ochib berishini qayd etdi. Shuningdek, 2025 yil uchun belgilangan ikki tomonlama kun tartibi sermazmun va istiqbolli ekanligi alohida ta’kidlandi.

“Turli sohalarda hamkorlikni mustahkamlash biz uchun asosiy ustuvor vazifadir”, — dedi tashqi ishlar vaziri.

O‘zbekiston va Sloveniya o‘rtasida savdo, sarmoya, madaniyat, ta’lim va boshqa sohalarda hamkorlikni rivojlantirishga qaratilgan tashabbuslar muhokama qilindi.