O‘zbekistonda bolalar uchun mo‘ljallangan milliy kontentlarni yaratish va ommalashtirishni qo‘llab-quvvatlash bo‘yicha Prezident qarori qabul qilindi.
2025-yil 15-mayda imzolangan qarorga (PQ–183) ko‘ra, bu yo‘nalishda faoliyat yurituvchi yuridik shaxslar qator soliq imtiyozlariga ega bo‘ladi.
Qaror bolalar tarbiyasiga ijobiy ta’sir ko‘rsatadigan kontentlarni ishlab chiqishni ustuvor yo‘nalishlar qatoriga qo‘shdi.
Jumladan:
sog‘lom turmush tarzi, ekologik madaniyat, milliy qadriyatlar va vatanparvarlikni targ‘ib qiluvchi kontentlar ishlab chiqish;
bolalar uchun xavfsiz axborot muhitini shakllantirish;
ota-onalar va bolalarni internetdagi zararli kontentlardan ogohlantiruvchi va baholashga yordam beruvchi vositalarni ishlab chiqish.
2025-yil 1-iyuldan 2030-yil 1-yanvargacha bolalar uchun kontent ishlab chiqarishdan olgan daromadi yillik umumiy daromadining kamida 80 foizini tashkil etgan yuridik shaxslar quyidagi imtiyozlardan foydalanadi:
— foyda solig‘idan ozod qilinadi;
— ijtimoiy soliqni atigi 1 foiz stavkada to‘laydi;
— bolalar uchun kontent yaratishga yo‘naltirilgan xarajatlarini foyda solig‘ini hisoblashda chegirib tashlash huquqiga ega bo‘ladi.
Shuningdek, har yili “El-yurt umidi” jamg‘armasi orqali xorijiy yetakchi oliy ta’lim muassasalarida bakalavriat darajasida tahsil olish uchun ushbu soha bo‘yicha 5 ta stipendiya kvotasi ajratiladi.
