Google uchun sun’iy intellektga asoslangan mahsulotlarni baholash va takomillashtirish bilan shug‘ullangan 200 dan ortiq xodim ogohlantirilmasdan ishdan bo‘shatildi. Bu haqda Wired jurnali xabar bermoqda.
Sobiq xodimlarning ma’lumotlariga ko‘ra, bu qisqartirishlar korporatsiyaning qoniqarsiz mehnat sharoitlari, jumladan, past ish haqi va mehnat kafolatlarining yo‘qligi tufayli kelib chiqqan noroziliklarning oldini olish uchun ko‘rilgan choralarning bir qismi hisoblanadi. Ushbu muammolar xodimlarning ruhiyati va o‘z vazifalarini samarali bajarish qobiliyatiga salbiy ta’sir ko‘rsatgani ta’kidlanmoqda.
So‘nggi bir necha yil ichida Google Gemini chatboti javoblarini tahlil qilish, tahrirlash va tuzatishni o‘z ichiga olgan sun’iy intellektni baholash vazifalarini minglab pudratchilar zimmasiga yuklab keldi. Bu ishlar Yaponiyaning Hitachi kompaniyasiga qarashli GlobalLogic kabi autsorsing kompaniyalari, shuningdek, boshqa tashqi firmalar orqali amalga oshirilgan.
Ishdan bo‘shatilgan xodimlardan biri Endryu Lozonning nashrga aytishicha, uning tizimlarga kirishi to‘satdan to‘xtatilgan va bunga sabab sifatida “loyihani tugatish” ko‘rsatilgan, biroq u bu izohni noaniq deb hisoblagan. Shuningdek, GlobalLogic joriy yildan boshlab o‘z xodimlarini muntazam ravishda ishdan bo‘shata boshlagan. Bu xodimlarda ish bilan ta’minlanish kafolatlarining yo‘qligi va ish joyida himoyalanmaganlik hissi bilan bog‘liq chuqur tashvish uyg‘otmoqda, chunki ular istalgan paytda ishdan bo‘shatilishi mumkinligini anglamoqda.
Bundan avval AQSH federal sudi Google kompaniyasini foydalanuvchilarning maxfiyligini buzganlikda ayblab, 425 million dollar jarimaga tortilgani xabar qilingandi.
