Isroil hukumati Eron tomonidan amalga oshirilgan raketa hujumlari oqibatida beshta harbiy obyekt, jumladan yirik aviabaza zararlangani haqidagi ma’lumotni ommadan yashirgani aniqlandi. Bu haqda The Daily Telegraph gazetasi Oregon shtati universiteti olimlari tomonidan o‘tkazilgan sun’iy yo‘ldosh tasvirlari tahliliga tayanib xabar berdi.

Ma’lumotlarga ko‘ra, Eronning oltita raketasi Isroilning shimol, janub va markaziy hududlaridagi muhim harbiy obyektlarga — razvedka markazi va logistik bazani ham o‘z ichiga olgan — zarba bergan.

Umuman olganda, 12 kun davom etgan to‘qnashuvda Eron Isroilning 40 dan ortiq infratuzilma nuqtalarini nishonga olgan.

Isroil Mudofaa kuchlari bu zarbalar yuzasidan izoh bermadi, biroq barcha bo‘linmalar uzluksiz faoliyat ko‘rsatganini bildirdi.

The Daily Telegraphga ko‘ra, Isroil va AQShning havo mudofaa tizimlari ushbu hujumlar vaqtida raketalarning 84 foizini yo‘ldayoq urib tushirgan.