Hindiston janubidagi Telangana shtatida joylashgan kimyo zavodida yuz bergan kuchli portlash va yong‘in oqibatida kamida 39 kishi halok bo‘ldi, 30 dan ortiq odam jarohat oldi. Bu haqda Reuters va mahalliy axborot agentliklari xabar bermoqda.

Portlash dushanba kuni, Haydarobod shahridan 48 km uzoqlikda joylashgan Pashamylaram sanoat hududida joylashgan “Sigachi Industries” zavodida sodir bo‘ldi. Politsiya ma’lumotiga ko‘ra, voqea sodir bo‘lgan vaqtda zavodda 150 ga yaqin ishchi bo‘lgan, ulardan 90 nafari portlash markaziga yaqin joyda bo‘lgan.

Portlash ortidan kuchli yong‘in chiqib, binoning katta qismi qulab tushgan. Qutqaruvchilar hali ham vayronalar ostidan omon qolganlarni qidirishmoqda.

Hukumat hodisani tergov qilish uchun maxsus komissiya tuzganini ma’lum qildi. Portlash sababi hali rasman aniqlanmagan. Dastlab reaktor portlagani taxmin qilingan edi, ammo rasmiylar bu versiyani rad etdi.

Hozirda voqea joyida o‘nlab tez yordam mashinalari, o‘t o‘chirish brigadalari va politsiya ishlamoqda. Mahalliy sog‘liqni saqlash boshqarmasi jabrlanganlarga zarur tibbiy yordam ko‘rsatilayotganini bildirdi.