Shvetsiyada bir juft ota-ona o‘zlarining uch nafar farzandining tish gigiyenasiga loqayd munosabatda bo‘lgani uchun har biri 8 oyga ozodlikdan mahrum qilindi. Bu haqda mamlakatning yetakchi nashrlaridan biri — “Aftonbladet” gazetasi xabar berdi.

 Tibbiy ko‘rik chog‘ida aniqlanishicha, maktabgacha yoshdagi bir qiz va ikki o‘g‘ilning tishlari chuqur karyes bilan zararlangan. Holat shu darajada og‘ir bo‘lganidan, ba’zi tishlarni olib tashlashga majbur bo‘lishgan.

 Qizcha narkoz ostida 8 ta tishidan ajralgan, har bir o‘g‘il bola esa 4 tadan tishini yo‘qotgan. Yana aniqlanishicha, og‘iz bo‘shlig‘i infektsiyalangan, og‘riqli yiringli yallig‘lanishlar yuzaga kelgan.

Ish bo‘yicha prokuror Sofiya Bryungelsson bayonotida bunday holatni “jinoyat” deb atagan va sudda ota-onalarni qamoq jazosi bilan jazolash tarafdori bo‘lgan.

“Ota-onalar bolalariga g‘amxo‘rlik qilish uchun mas’ul. Bu holatda e’tiborsizlik darajasi jinoiy deb baholanadi,” — dedi prokuror Bryungelsson.

 Sud jarayonida ota-onalar o‘z ayblarini tan olmagan, biroq sudya ular farzandlariga zarur tish parvarishini ko‘rsatmagani uchun har biri bo‘yicha 8 oy qamoq jazosi tayinlagan.