O‘zbekiston hukumati Rossiya Federatsiyasi, Qozog‘iston va Ozarbayjon fuqarolariga mamlakatga ichki hujjat yoki ID karta orqali 30 kungacha kirish imkoniyatini joriy etishni ko‘rib chiqmoqda. Bolalar uchun esa “kinder pasport” orqali kirish tartibi nazarda tutilgan.
Mazkur tashabbus Prezident Shavkat Mirziyoyev tomonidan 2025-yil 15-mayda imzolangan sayyohlar oqimini keskin oshirish bo‘yicha farmonida belgilangan. Ichki ishlar vazirligi uch oy ichida mazkur davlatlar bilan muzokaralarni boshlashi lozim.
Eslatib o‘tamiz, O‘zbekiston 2023-yilda ushbu tartibni birinchi bo‘lib Qirg‘iziston uchun joriy qilgan edi.
Shu farmonda, shuningdek, AQSh fuqarolari uchun O‘zbekistonga 30 kunlik vizasiz rejim joriy etish hamda AQSh fuqarolari uchun vizani yengillashtirish bo‘yicha muzokaralar boshlash rejalari ham ko‘zda tutilgan.
Bundan tashqari, 2025-yil 1-iyundan boshlab Bahrayn, Quvayt va Ummon fuqarolari uchun O‘zbekistonga 30 kunlik vizasiz kirish tartibi amal qiladi.
