2026-yil mart oyida futbol olamining e’tibori yana bir bor Yevropaga qaratiladi. UEFA va CONMEBOL tomonidan tashkil etilgan “Finalissima” o‘yinida Yevropa chempioni Ispaniya terma jamoasi Janubiy Amerika chempioni Argentina bilan maydonga tushadi.
Bu uchrashuv futbol tarixining ikki avlod yulduzlari — Lionel Messi va Lamine Yamal o‘rtasidagi ilk rasmiy to‘qnashuv sifatida katta qiziqish uyg‘otmoqda.
Finalissima — bu UEFA (Yevropa futbol uyushmasi) va CONMEBOL (Janubiy Amerika futbol konfederatsiyasi) hamkorligida o‘tkaziladigan interkontinental turnir bo‘lib, UEFA EURO va “Copa America” musobaqalari g‘oliblari o‘rtasida o‘ynaladi. 1985- va 1993-yillarda Artemio Franchi kubogi nomi ostida tashkil etilgan bu musobaqa 2022-yilda qayta tiklangan edi. O‘sha yili Argentina Italiyani 3:0 hisobida mag‘lub etib, Finalissimaning birinchi “yangi formatdagi” chempioni bo‘lgandi.
2026-yilgi “Finalissima” Ispaniya va Argentina o‘rtasida bo‘lib o‘tadi. Ispaniya 2024-yilgi UEFA EURO chempionatida g‘olib chiqqan, Argentina esa 2024-yilgi “Copa America” musobaqasida Kolumbiyani finalda mag‘lub etgan.
O‘yin 2026-yilning 23–31 mart oralig‘ida o‘tkazilishi belgilangan. Hozircha o‘yinning aniq sanasi va joyi tasdiqlanmagan, ammo UEFA tomonidan bu uchrashuv Yevropada bo‘lib o‘tishi ma’lum qilindi. Final o‘yini o‘tkazilishi mumkin bo‘lgan stadionlar sifatida Parij, London, Rim va Myunxen shaharlari tilga olinmoqda.
Uchrashuvning eng katta intrigasini Lionel Messi va Lamine Yamal o‘rtasidagi to‘qnashuv tashkil etadi.
Messi — yetti karra “Ballon d’Or” sohibi, hozirda “Inter Miami” safida o‘ynamoqda. U 2022-yilgi Jahon chempionati va 2024-yilgi “Copa Amrrica”da g‘alaba qozongan hamda 2022-yilda Italiyaga qarshi Finalissima o‘yinida ham porlagan edi.
Lamine Yamal esa Ispaniya futbolining yangi umidi. 17 yoshli hujumchi 2024-yilgi UEFA EURO musobaqasida Angliyaga qarshi final o‘yinida gol urgan va musobaqaning eng yaxshi yosh futbolchisi deb topilgan. U 2023-yilda Ispaniya terma jamoasida debyut qilgan bo‘lib, La Liga tarixidagi eng yosh futbolchi sifatida bir qancha rekordlarni yangilagan.
Ispaniya va Argentina hozirga qadar 14 marta o‘zaro maydonga tushgan. Har ikkala jamoa 6 martadan g‘alaba qozongan, 2 o‘yin durang bilan yakunlangan. Ularning yagona rasmiy to‘qnashuvi 1966-yilgi Jahon chempionatida bo‘lib o‘tgan va unda Argentina 2:1 hisobida zafar quchgan.
“Finalissima 2026” nafaqat ikki qit’a g‘oliblari o‘rtasidagi kurash, balki futbol tarixidagi eng katta yulduzlardan biri — Messi va kelajakning superyulduziga aylanishi kutilayotgan Yamal o‘rtasidagi tarixiy to‘qnashuv bo‘lishi bilan ahamiyatli.
Futbol ishqibozlari bu o‘yinni shunchaki sport musobaqasi emas, balki yangi davrning boshlanishi sifatida ko‘rmoqda.
