Isroil G‘azo sektoriga cheklangan miqdorda gumanitar yordam kiritilishiga ruxsat berdi. 2025-yil 20-maydan boshlab oziq-ovqat, dori-darmon va zarur tibbiy anjomlar ortilgan yuk mashinalari hududga kirishni boshladi.

BMT va xalqaro gumanitar tashkilotlar uzoq vaqt davomida G‘azoda ocharchilik xavfi yuqoriligini bildirib, yordam yo‘llarining ochilishini talab qilib kelayotgan edi. Ayrim ma’lumotlarga ko‘ra, minglab bolalar og‘ir oziqlanish yetishmovchiligi bilan yuzlashmoqda.

Yordam karvonlari Rafah va Kerem Shalom chegara punktlari orqali o‘tkazilmoqda. 20-may kuni Isroilning Kerem Shalom chegara punkti orqali BMTga tegishli 93 ta yuk mashinasi G‘azoga kiritildi. Bu yuk mashinalari un, bolalar uchun oziq-ovqat, dori-darmon va tibbiy anjomlarni o‘z ichiga olgan.

Isroil hukumati bu yordam faqat xalqaro tashkilotlar nazorati ostida tarqatilishi va harbiy maqsadlarda ishlatilmasligini qat’iy belgilab qo‘ydi. Shunga qaramay, Birlashgan Millatlar Tashkiloti rasmiylari bu yordam hajmi mavjud ehtiyojlarning juda kichik qismini qoplashini bildirgan.

BMTning gumanitar masalalar bo‘yicha koordinatori Tom Fletcher bu yordamni “okeandagi bir tomchi” deb atadi. Uning so‘zlariga ko‘ra, 14,000 ga yaqin chaqaloq agar zudlik bilan yordam yetkazilmasa, 48 soat ichida oʻlim xavfi ostida.

G‘azo sektori 2023-yildan beri harbiy to‘qnashuv, energetik inqiroz va to‘liq blokada sabab og‘ir gumanitar ahvolda qolmoqda. Isroil va G‘azo o‘rtasidagi nizo xalqaro miqyosda chuqur xavotir uyg‘otmoqda. AQSh, Yevropa Ittifoqi va boshqa davlatlar tinchlik va barqarorlikni tiklash bo‘yicha choralarni tezlashtirishga chaqirmoqda.

Shuningdek, Yevropa Ittifoqi Isroil bilan savdo muzokaralarini ko‘rib chiqayotganini bildirdi. Britaniya, Avstraliya va Kanada ham Isroilning gumanitar yordamga qo‘ygan cheklovlarini tanqid qilib, yordamning mustaqil va to‘siqsiz yetkazilishini talab qilmoqda.