Davlat xavfsizlik xizmati (DXX)ning Navoiy viloyati bo‘yicha boshqarmasi va ichki ishlar organlari tomonidan olib borilgan tezkor tadbir natijasida, “Navoiy kon-metallurgiya kombinati” AJning Shimoliy kon boshqarmasiga qarashli 3-son Gidrometallurgiya zavodida ishlovchi uch nafar xodim — ikki nafar smena ustasi va bir nafar bo‘linma aparatchisi — noqonuniy harakatda gumon qilinib qo‘lga olindi.

Rasmiylarga ko‘ra, ular oldindan til biriktirib, tarkibida yirik miqdorda oltin bo‘lgan 2 kilogramm og‘irlikdagi yarim tayyor mahsulotni yashirin ravishda talon-toroj qilish maqsadida zavoddagi havo tozalash quvuriga yashirib qo‘ygan.

Ekspertiza xulosasiga ko‘ra, mahsulot tarkibida 1 kilogramm 523 gramm sof oltin aniqlangan bo‘lib, uning bozor qiymati 2 milliard 102 million so‘mga teng.

Mazkur holat yuzasidan Jinoyat kodeksining 25 hamda 169-moddasi 4-qism “a” bandi asosida jinoyat ishi qo‘zg‘atildi. Hozirda tergov ishlari davom etmoqda.