Rossiya va Ukraina o‘rtasidagi navbatdagi muzokaralar 15-may kuni Istanbulda bo‘lib o‘tishi kutilmoqda. Biroq Kreml Ukraina prezidenti Vladimir Zelenskiyning faqat Vladimir Putin bilan uchrashuv taklifini rad etdi va delegatsiyani prezident yordamchisi Vladimir Medinskiy boshchiligida yuboradi. Bu haqda Kreml rasmiy sayti xabar berdi.

Putin shaxsan kelmaydi: delegatsiya tarkibi ma’lum qilindi

Rossiya delegatsiyasiga quyidagi shaxslar kiradi:

• Vladimir Medinskiy — Prezident yordamchisi, delegatsiya rahbari.

• Mixail Galuzin — Tashqi ishlar vaziri o‘rinbosari.

• Aleksandr Fomin — Mudofaa vaziri o‘rinbosari.

• Igor Kostyukov — Rossiya Bosh razvedka boshqarmasi (GRU) rahbari.

Kremlning bu qarori Zelenskiyning Putin bilan to‘g‘ridan-to‘g‘ri muzokara o‘tkazish istagiga zid bo‘ldi. Ukraina tomonining rasmiy javobi hozircha e’lon qilinmagan. Ukraina uchun delegatsiya darajasi muhim

Vladimir Zelenskiy ilgari faqat yuqori lavozimdagi rossiyalik vakillar ishtirokida muzokara o‘tkazishga tayyor ekanligini bildirgan edi. Hozircha Ukraina delegatsiyasi tarkibi oshkor qilinmagan.

Ukraina TIV rahbari Andriy Sibiga Antaliyada NATO tashqi ishlar vazirlari uchrashuvida ishtirok etmoqda va u AQSh Davlat kotibi o‘rinbosari Marko Rubio va senator Lindsi Grem bilan uchrashgan.

Istanbuldagi uchrashuvdan kutilayotgan natijalar

Kreml 2022-yil bahoridagi Belarus va Istanbul muzokaralari formatini saqlab qolishni maqsad qilgan. Avvalgi uchrashuvda  ham muzokaralarga Medinskiy rahbarlik qilgan va muhim kelishuvlarga erishilmagan edi.

G‘arb razvedkasi ma’lumotlariga ko‘ra, Rossiya frontdagi yo‘qotishlarni qoplashga urinayotgan bo‘lsa-da, territorial yutuqlarga erisha olmayapti. Bu safargi muzokaralarda ham muhim siljish kutilmayapti.

 Moskvaning pozitsiyasi o‘zgarmadi

Ekspertlar ta’kidlashicha, Kreml delegatsiya tarkibi orqali o‘z pozitsiyasini o‘zgartirmaganini ko‘rsatmoqda. Rossiya 2022-yilda muzokara qilinmagan kelishuvlarni muhokama qilishga urinmoqda.

Zelenskiy esa natija beradigan, real tinchlikka olib keladigan muzokaralarni kutmoqda. U Turkiya prezidenti Rajab Toyyib Erdo‘g‘on bilan uchrashishi va agar Putin Istanbulga kelsa, muzokaralarda ishtirok etishini bildirgan.

Boshqa tomondan, AQSh delegatsiyasi 16-may kuni Istanbulga tashrif buyuradi. Muzokaralarning aniq formati va natijalari esa hanuz noma’lum.