O‘zbekiston Mudofaa vaziri general-mayor Shuxrat Xolmuhammedov va Rossiya Mudofaa vaziri Andrey Belousov bugun Moskvada uchrashib, 2026–2030 yillarga mo‘ljallangan harbiy strategik sheriklik dasturini imzoladi. Bu haqda Rossiya Mudofaa vazirligi rasmiy bayonot berdi.

Uchrashuv davomida tomonlar ikki davlat o‘rtasidagi harbiy aloqalarni chuqurlashtirish, texnik hamkorlikni mustahkamlash va xavfsizlik bo‘yicha hamkorlik doirasini kengaytirish masalalarini muhokama qildilar.

Rossiya tomoni O‘zbekiston SSRning Ikkinchi jahon urushida ko‘rsatgan xizmatlarini alohida e’tirof etdi. Belousov o‘z nutqida:

“O‘zbekiston xalqi g‘alaba uchun ulkan qurbonliklar bergan, bu tarixni biz hech qachon unutmaymiz,” — dedi.

Shuningdek, O‘zbekiston harbiy delegatsiyasi 9-may kuni Moskvada o‘tkazilgan G‘alaba paradida ishtirok etdi. General-mayor Xolmuhammedov, Rossiya tomoniga mehmondo‘stlik va o‘zbekistonlik harbiylar uchun yaratilgan sharoitlar uchun minnatdorlik bildirdi.

Mazkur hujjat avvalroq Toshkentda 2025-yilga mo‘ljallangan hamkorlik rejasi doirasida boshlangan muzokaralarning davomi sifatida baholanmoqda. U ikki tomonlama harbiy ishonchni mustahkamlash yo‘lida navbatdagi strategik qadam bo‘lishi kutilmoqda.