O‘zbekistonda 2025-yil 1-iyundan yo‘l harakati qoidabuzarliklari uchun haydovchilarga jarima ballari avtomatlashtirilgan tarzda hisoblanadi — bu yangi tizim haydovchilarning mas’uliyatini oshirishga qaratilgan.
Vazirlar Mahkamasi qaroriga ko‘ra, O‘zbekistonda yo‘l harakati qoidabuzarliklari uchun haydovchilarga jarima ballari hisoblash tizimi joriy qilinmoqda. Mazkur tartib 2025-yil 1-iyundan kuchga kiradi.
Yangi Nizomga ko‘ra, jarima ballari faqat Yo‘l harakati xavfsizligi xizmati xodimlari tomonidan tuzilgan ma’muriy bayonnomalar asosida rasmiy qaror chiqqan taqdirda hisoblanadi. Har bir haydovchiga ballar qoidabuzarlik sodir etilgan kundan boshlab keyingi yilgacha amal qiladi.
Tizim qanday ishlaydi?
Jarima ballari avtomatlashtirilgan “E-jarimaball” moduli orqali inson aralashuvisiz shakllantiriladi. Ushbu tizim orqali haydovchilar o‘z ballari haqidagi ma’lumotni istalgan vaqtda onlayn tarzda ko‘rishlari mumkin.
Tizim quyidagi tartibda ishlaydi:
-
8 ballga yetganda haydovchiga SMS orqali ogohlantirish yuboriladi;
-
12 ballga yetmagan holatda, to‘plangan ballar keyingi davr hisobiga o‘tmaydi;
-
Agar sud qoidabuzarlikni tasdiqlasa, ballar xuddi huquqbuzarlik sodir bo‘lgan kundan hisoblanadi.
Ushbu yangilik yo‘l harakati madaniyatini oshirish, xavfsizlikni mustahkamlash va avtomobil boshqaruvchi shaxslarning mas’uliyatini kuchaytirishga xizmat qilishi kutilmoqda.
