Meksika harbiy-dengiz kuchlariga qarashli yelkanli o‘quv kemasi juma kuni kechqurun Bruklin ko‘prigiga urildi. Hodisa oqibatida ikki nafar ekipaj a’zosi halok bo‘ldi, 22 kishi jarohat oldi, deya xabar berdi mahalliy rasmiylar.

Voqea mahalliy vaqt bilan soat 20:26 da yuz berdi. “ARM Kuautemok” nomli kema 277 kishilik ekipaj bilan safarda bo‘lib, xalqaro do‘stlik tashrifining bir qismi sifatida Nyu-York portiga kelgan edi.

Dastlabki tergov xulosalariga ko‘ra, kemada elektr uzilishi sababli boshqaruv yo‘qolgan. Natijada, 45 metrlik ustunlari bilan kema Bruklin ko‘prigining pastki qismiga urilgan.

Mahalliy sog‘liqni saqlash xizmatlariga ko‘ra, halok bo‘lganlar — bir ayol kursant va bir erkak dengizchi. Jarohat olganlar orasida kamida uch nafarining ahvoli og‘ir.

Nyu-York meri Erik Adams hodisadan chuqur qayg‘uda ekanini bildirib, yordam bergan favqulodda xizmat xodimlariga minnatdorlik izhor etdi.