Hindistonning Siyati qishlogʻida it 67 kishini koʻchkidan qutqarib qoldi, deb yozadi The Independent.
Qayd etilishicha, voqea 30-iyun kuni kechqurun Ximachal-Pradesh shtatining Mandi okrugida sodir boʻlgan. Tunda besh oylik kuchuk kutilmaganda qattiq akillay boshlagan. Natijada Narendra ismli erkak uygʻonib ketgan va devordagi yoriqqa koʻzi tushgan. Shundan soʻng, u qoʻshnilarini ogohlantirish uchun yugurgan.
It va mahalliy fuqaroning harakati sabab 20 ga yaqin oila uylarini oʻz vaqtida tark etishga muvaffaq boʻlgan. Oradan koʻp oʻtmay qishloq koʻchki ostida qolgan. Qishloqning omon qolgan barcha aholisi Naina Devi ibodatxonasiga vaqtinchalik joylashtirilgan. Shtat hukumati har bir jabrlangan oila uchun 10 ming rupiy (116 dollar) ajratgan.
Maʼlumotlarga koʻra, ikki hafta ichida Mandi okrugida kuchli yogʻingarchiliklar kuzatilib, koʻchkilarni yuzaga keltirgan. Tabiiy ofat sabab 150 tadan ortiq yoʻl yopilib qolgan, yuzlab uylar vayron boʻlgan. NDTVʼning yozishicha, iyul boshidan beri shtatda suv toshqinlari va koʻchkilar oqibatida kamida 50 kishi halok boʻlgan.
