Astronomlar Quyosh tizimida tarixda uchinchi marta boshqa yulduz tizimidan kelgan kosmik jismni aniqlashdi. Bu obyekt “3I/ATLAS” deb nomlandi va u Chilidagi ATLAS teleskopi orqali kuzatildi.

Ilgari atigi ikkita shunday yulduzlararo “mehmon” qayd etilgan edi – 2017-yilda “Oumuamua” nomli asteroid va 2019-yilda “Borisov” kometasi.

“3I/ATLAS” Yer atrofida aylanmaydi. U Quyosh tizimi orqali to‘g‘ri yo‘nalishda uchib o‘tmoqda. Uning tezligi soniyasiga 58 kilometr bo‘lib, bu Quyosh tortish kuchidan qochish uchun yetarli – ya’ni bu obyekt tizimimizga bir marta kiradi va chiqib ketadi.

Olimlarning taxminiga ko‘ra, obyektning diametri taxminan 20 kilometr. Bu – Yerga 66 million yil oldin qulagan va dinozavrlarni yo‘q qilgan asteroidga yaqin o‘lcham.

“3I/ATLAS” 2025-yil oktabr oyida Quyoshga eng yaqin masofaga yetadi. U sayyoramizga 270 million kilometrdan ortiq masofada bo‘ladi.

Shunga qaramay, olimlar yulduzlararo jismlar potentsial xavfli bo‘lishi mumkinligini ta’kidlashmoqda. Chunki ular odatdagi Quyosh tizimi obyektlaridan farqli o‘laroq, Yer atrofida aylanish o‘rniga bevosita uchib o‘tadi. Bu esa ularning harakati oldindan ogohlantirishsiz to‘g‘ridan-to‘g‘ri to‘qnashuvga olib kelishi mumkin degani.

Agar bunday obyekt Yer bilan to‘qnashish trayektoriyasiga tushsa, tahdidga qarshi chora ko‘rishga vaqt qolmasligi mumkin, deyishmoqda olimlar.