Xitoyda ishsiz yoshlar orasida noodatiy tendensiya tarqalmoqda: ular haqiqiy ish topmagan bo‘lsa-da, o‘zlarini ishlayotgandek ko‘rsatish uchun maxsus kompaniyalarga pul to‘layapti.

Bu kompaniyalar ishsizlarga kuniga 30–50 yuan (taxminan 4–7 dollar) evaziga ofis muhitida vaqt o‘tkazish imkonini beradi. Mijozlar zamonaviy ofis stollari, tushlik zonasi va Wi-Fi bilan ta’minlanadi. Istaganlar qo‘shimcha haq evaziga soxta rahbarlar, sun’iy topshiriqlar va hattoki “xodimlar noroziligi” sahnalarini ham olishi mumkin.

Yangi trend Pekin, Shanxay kabi yirik shaharlarda arzon ofis joylari mavjudligi va yoshlar orasidagi ishsizlikning yuqoriligi bilan izohlanmoqda. 2025-yil mart oyida 16–24 yoshdagi (talabalardan tashqari) yoshlarda ishsizlik darajasi 16,5 foizga yetgan.

“Uyda o‘tirgandan ko‘ra, bu yerga kelib, odamlar orasida bo‘lish yoqimliroq,” — deydi Xu Lin ismli kontent yaratuvchi. “Ba’zilar haqiqiy ish topishga umid qiladi, boshqalar esa bu tajribani shunchaki qiziq deb biladi.”

Ko‘pchilik bunday joylarni kafe yoki ko‘ngilochar maskanlarga arzon alternativ sifatida ko‘radi. Ekspertlarga ko‘ra, Xitoydagi mehnat madaniyatining kuchli bosimi tufayli yoshlar o‘zini ishlayotgandek tutishga ehtiyoj sezmoqda.

Bu holat jamiyatda ishsizlik muammosiga yangicha yondashuvni ko‘rsatmoqda: ish bo‘lmasa ham, “ishlayotganga o‘xshab” yashash.