Hamasning juma kuni eʼlon qilishicha, u hali ham AQSh elchisi Stiv Vitkof tomonidan taqdim etilgan Gʻazo bo‘yicha vaqtinchalik sulh taklifini Falastin guruhlari bilan birga muhokama qilmoqda.
Bu orada Isroilning navbatdagi havo hujumlari oqibatida kamida 27 kishi halok bo‘lgan.
Sulh rejasiga koʻra, Isroil kuchlari avvalgi sulh yakunida egallagan pozitsiyalariga qaytishi, Hamas esa 10 nafar tirik garovdagilar va bir nechta jasadlarni ozod qilishi evaziga Isroil 1 100 dan ortiq falastinlik mahbus, jumladan og‘ir jinoyatlarda ayblanib uzoq muddatga hukm qilingan 100 kishini ozod qilishi nazarda tutilgan. Sulh 60 kun davom etadi va bu vaqt mobaynida uzoq muddatli tinchlik bo‘yicha muzokaralar olib borilishi kerak. Shuningdek, Isroil garovdagilar ozod qilinganidan keyin urushni qayta boshlamaslikka kafolat berishi kutilmoqda.
Tramp juma kuni Vashingtonda jurnalistlar bilan suhbatda: “Ular G‘azo boʻyicha juda yaqin kelishuvga kelishmoqda, bu haqida bugun yoki ertaga maʼlumot beramiz,” dedi. Kechga yaqin esa, Hamas bu rejani qabul qiladimi, degan savolga: “Ular ogʻir ahvolda. Ular bu holatdan chiqishni istashadi, deb oʻylayman,” deb javob berdi.
Payshanba kuni Hamas vakili Bassem Naim taklifga salbiy munosabat bildirib, “Bu taklif xalqimizning hech bir talabiga, eng muhimi urush va ocharchilikni to‘xtatishga javob bermaydi,” dedi.
BMT matbuot kotibi Stefan Dujarik tomonlarni siyosiy jasorat topib, kelishuvga erishishga chaqirdi. Qatar elchisi Alia Ahmad Sayf Al-Tani esa “biz Gʻazodagi bu dahshatli vaziyatni to‘xtatishga qat’iy bel bog‘laganmiz,” dedi.
Mutaxassislarning taʼkidlashicha, Gʻazoga har kuni yuzlab yuk mashinalari orqali oziq-ovqat va gumanitar yordam kirishi kerak. Soʻnggi kunlarda blokada biroz yumshatilgan bo‘lsa-da, deyarli uch oydan beri davom etayotgan cheklovlar aholining ocharchilik yoqasiga kelib qolishiga sabab bo‘lgan.
Juma kuni shifoxona xodimlari Isroil tomonidan o‘tkazilgan alohida havo hujumlari oqibatida 27 kishi halok bo‘lganini bildirdi. Xon Yunusdagi chodirga yo‘naltirilgan zarba natijasida 13 kishi, shu jumladan 8 bola halok bo‘lgan. Isroil armiyasi bu borada izoh bermagan.
Shu kuni Jabaliya qochqinlar lageridan Shifa shifoxonasiga 12 jasad, jumladan uch ayol jasadi olib kelingan. Falastin Qizil Yarim Oy jamiyati yana ikki jasad Gʻazo shahridagi shifoxonaga yetkazilganini aytdi.
Payshanba kuni Gʻazada kamida 72 kishi halok bo‘lgan. Biroq bu raqam janglar tufayli aloqadan uzilgan shimoldagi baʼzi shifoxonalardagi qurbonlarni o‘z ichiga olmaydi.
Urush 2023-yil 7-oktabr kuni Hamas Isroilga hujum qilib, 1 200 ga yaqin kishini — asosan tinch aholini — o‘ldirib, 250 kishini garovga olganidan keyin boshlangan. Hozirda 58 garovdagi kishi G‘azoda qolmoqda, ammo Isroil ularning 35 nafari halok bo‘lganiga ishonadi. Bosh vazir Benyamin Netanyahu qolganlarning taqdiri haqida “shubhalar bor”ligini aytgan.
G‘azo Sog‘liqni saqlash vazirligi maʼlumotiga ko‘ra, urush boshlanganidan beri 54 mingdan ortiq odam halok bo‘lgan. Aksariyati ayollar va bolalar. Bu raqamlar jangarilar va tinch aholi o‘rtasida farq qilmaydi.
Markaziy Gʻazodagi Deyr al-Balah shahrida yashovchi Muhammad Abed Associated Press’ga: “Bu ochlik, o‘lim, qamal va oziq-ovqat bilan hojatxona oldida navbatlar urushi. Bu 2025, 2024 va 2023-yillarning dahshati,” dedi.
Abedning aytishicha, u va oilasi kuniga faqat bir mahal ovqat yeydi, baʼzan uch soat navbatda turib ozgina guruch olishadi. “Odamlarning siyosat tufayli och qolayotgani yurakni ezadi. Oziq-ovqat va suv siyosiy vosita bo‘lishi kerak emas,” dedi u.
Yana bir g‘azolik, Muhammad Mreil esa: “Biz yashashni istaymiz, ularning (isroilliklarning) ham yashashini istaymiz. Xudo bizni o‘lish uchun yaratmagan,” deya qo‘shimcha qildi.
