Xitoyning sharqiy Shandun provinsiyasida joylashgan kimyo zavodida kuchli portlash yuz berdi. Rasmiylarga ko‘ra, voqea natijasida kamida besh kishi halok bo‘lgan, 19 kishi jarohat olgan va olti kishining taqdiri noma’lumligicha qolmoqda. Qidiruv-qutqaruv ishlari voqea joyida davom etmoqda.

Portlash seshanba kuni, mahalliy vaqt bilan soat 11:57 da, Gaomi Youdao Chemical Co. zavodida sodir bo‘lgan. Zavod pestitsidlar va farmatsevtika sanoati uchun kimyoviy mahsulotlar ishlab chiqaradi. Rasmiylar portlashning sababini aniqlashga urinishmoqda.

Hodisa joyiga 230 dan ortiq yong‘in va favqulodda vaziyatlar xodimlari, shuningdek 55 ta texnika vositasi safarbar etilgan. Qutqaruvchilar hozirda vayronalar ostida qolgan deb taxmin qilinayotgan olti kishini izlamoqda. Portlash atrofdagi binolarga ham zarar yetkazgan, oynalar singan, bir necha kilometr radiusdagi inshootlar larzaga kelgan.

Atrof-muhitni muhofaza qilish bo‘yicha mahalliy idoralar hodisaning ekologik oqibatlarini o‘rganmoqda. Portlashdan keyin havoda yoki yer osti suvlarida xavfli kimyoviy moddalarning tarqalgani haqida hozircha ma’lumot yo‘q.

Rasmiy hujjatlarga ko‘ra, zavod 2024-yilda xavfsizlik standartlariga amal qilmaganlik uchun bir necha bor ogohlantirilgan, biroq keyinchalik tekshiruvlarda muammolar bartaraf etilgan deb topilgan.

Bu hodisa Xitoydagi sanoat xavfsizligiga oid xavotirlarni yana bir bor yuzaga chiqardi. 2024-yil davomida mamlakatda 21 800 dan ortiq sanoat avariyasi qayd etilgan va 19 600 dan ortiq odam halok bo‘lgan.
Mahalliy rasmiylar portlash yuzasidan tergov boshlagan. Zavod faoliyati vaqtincha to‘xtatilgan.