O‘zbekiston Oliy ta’lim, fan va innovatsiyalar vaziri Qo‘ng‘irotboy Sharipov mamlakatda sirtqi ta’lim shakli tugatilganini taʼkidladi. Unga ko‘ra, asosiy sabab — bu yo‘nalishda ta’lim sifati yetarli darajada ta’minlanmagani.
“Bu yo‘nalishda ta’lim sifatini 100 foiz kafolatlab bo‘lmaydi. Talabalarning ko‘pchiligi ishlaydi, darslarga vaqtida qatnasha olmaydi. Bu hammamizga ayon, yashiradigan joyi yo‘q”, — degan vazir “Daryo” internet nashriga bergan intervyusida.
Sharipovning aytishicha, sirtqi o‘qish o‘rniga endilikda masofaviy (onlayn) ta’lim yo‘lga qo‘yiladi. Bunday ta’limda nazorat kuchli bo‘ladi: talabalar har kuni kompyuter orqali darsga kiradi, agar o‘rniga boshqa odam kirsa yoki imtihon paytida ruxsatsiz materiallardan foydalansa, tizim avtomatik ravishda ulanishni to‘xtatadi.
Vazirning so‘zlariga ko‘ra, dunyoning ko‘plab rivojlangan mamlakatlarida sirtqi ta’lim shakli mavjud emas.
“Biz ham xalqaro tajribani o‘rganib, kredit-modul tizimiga o‘tdik, dunyoning eng yaxshi 300 universiteti dasturlarini olib kelyapmiz. Xorijlik professorlarni taklif qilmoqdamiz”, — dedi u.
Sharipov, shuningdek, Yevropa va AQSh tajribasiga to‘xtaldi: u yerda kunduzgi, kechki, masofaviy va uzaytirilgan ta’lim shakllari mavjud. Ba’zi talabalar universitetni 4 yil emas, 5–10 yil ichida ham tamomlashi mumkin. “Shuning uchun sirtqi ta’lim bekor qilinishidan cho‘chimaslik kerak. Uning o‘rniga zamonaviy va qulayroq shakl taklif etilyapti”, — deya qo‘shimcha qilgan vazir.
