Janubiy Koreya parlamenti maktablarda dars paytida mobil telefonlar va smartfonlardan foydalanishni taqiqlovchi qonunni qabul qildi. Taqiq 2026-yil mart oyidan kuchga kiradi.
Qonun, shuningdek, oʻqituvchilarga nafaqat darslarda, balki maktab binolarida ham oʻquvchilarga telefondan foydalanishni taqiqlash huquqini beradi. Bundan tashqari, maktablar oʻquvchilarga smart qurilmalardan toʻgʻri foydalanishni oʻrgatish majburiyatini oladi.
Hukumat tomonidan 2024-yilda oʻtkazilgan soʻrov natijalariga koʻra, Janubiy Koreyaning 51 mln aholisining deyarli chorak qismi oʻz telefonlariga bogʻlanib qolgan. Bu koʻrsatkich 10 yoshdan 19 yoshgacha boʻlgan bolalar orasida ikki baravar yuqori — 43 foizgacha.
