Andijon viloyatining Andijon tumanida ikki nafar voyaga yetmagan qizchaga muzqaymoq olib berishni va’da qilib aldab, ularni yashash joyidan uzoqlashtirgan va tilla taqinchoqlarini olib qo‘ygan erkak shaxs 5 yilga ozodlikdan mahrum etildi.
Voqea joriy yilning 29-aprel kuni sodir bo‘lgan. Prokuratura ma’lumotlariga ko‘ra, 32 yoshli erkak 5-6 yosh atrofidagi ikki qizchani velosipedda aylantirib kelib, ularga muzqaymoq olib berishini aytib, yashash joyidan 2-3 kilometr uzoqlikka olib borgan. U yerda u qizchalarni qulogʻida oʻrgimchak borligi bilan qoʻrqitib, har birida bo‘lgan bir juft tilla zirakni yechib olgan. Keyin esa ushbu ziraklarni umumiy 4 million so‘mdan ortiq pulga sotib yuborgan.
Sud tomonidan erkakka nisbatan Jinoyat kodeksining tegishli moddasi bo‘yicha ish ko‘rilib, unga 5 yil qamoq jazosi tayinlandi.
