Amerikalik milliarder Ilon Mask o‘zining yangi siyosiy partiyasi – “Amerika” partiyasini tuzganini e’lon qildi. Unga ko‘ra, partiya mamlakat fuqarolariga “erkinlikni qaytarish” maqsadida tashkil etilgan. Bu haqda Mask o‘zining X (sobiq Twitter) sahifasida yozib qoldirdi.

E’lon so‘rovnoma natijasidan so‘ng berildi: Maskning obunachilari o‘rtasida o‘tkazilgan so‘rovda 65,4 foiz odam yangi partiya tashkil etilishini yoqlab ovoz bergan. “Ikki kishi orasidan bittasi yangi partiyani istaydi – siz uni olasiz,” – deb yozdi u.

Maskning fikricha, AQShda real demokratiya emas, bir partiyali tizim hukm surmoqda. “Amerika partiyasi bugun tashkil etildi. Maqsad – sizga erkinlikni qaytarish,” – deydi u.

Maskning so‘zlariga ko‘ra, yangi partiya siyosiy maydonda hukmronlik qilishni emas, balki Senatda 2-3 ta, Vakillar palatasida esa 8-10 ta o‘rin olishni ko‘zlamoqda.

Bu tashabbus Tramp bilan bo‘lgan navbatdagi mojaro fonida e’lon qilindi. Mask avvalroq Trampni tanqid qilgan va “Big Beautiful Bill” nomli qonun loyihasiga qarshi chiqqan edi. U agar qonun qabul qilinsa, yangi partiya tuzishini bildirgan. 5 iyulga o‘tar kechasi Tramp ushbu qonunni imzoladi.
Shundan so‘ng Mask yana bir bor o‘z pozitsiyasini aniqladi: u endi na demokratlar, na respublikachilar tarafida emas.

Forbes’ning hisob-kitobiga ko‘ra, Ilon Mask dunyodagi eng boy inson bo‘lib, uning boyligi 405 milliard dollarni tashkil etadi. Shunga qaramay, u Trampning saylov kampaniyasidagi asosiy moliyaviy ko‘makchilaridan biri boʻlgan edi.