Toshkent shahrida texnik spirtni etil spirti sifatida sotgan shaxs qo‘lga olindi. Bosh prokuratura huzuridagi Departament tomonidan Chilonzor tumanida o‘tkazilgan tezkor tadbirda, fuqaro H.I. 1 420 litr texnik spirtni 14 208 dona tibbiyot flakoniga qadoqlab, fuqaro G.X. ga, etil spirtiga o‘xshatib, 3 900 AQSh dollariga sotgan va ushbu vaqtida ashyo dalillari bilan qo‘lga olingan.
Mazkur holat bo‘yicha Jinoyat kodeksining 168-modda (firibgarlik) va 186-1-modda (etil spirtini, alkogolli mahsulotlarni va tamaki mahsulotlarini qonunga xilof ravishda muomalaga kiritish yoki ishlab chiqarish) bo‘yicha jinoyat ishi qo‘zg‘atilgan va tergov harakatlari olib borilmoqda.
